الله الله يا رمضان
الله الله يا رمضان .. يا جماعة يا حلوه هالشهر .. كل شي فيه حلو .. هواه .. ناسه .. جوه .. حتى أكله حلو
ربك طارح فيه البركة بكل بقعة بالعالم .. يا حلات اليمعه فيه و السؤال عن الأحباب و الأصحاب لما تسأل عنهم و تبارك لهم (مو المسجات) تراهم يحسون بلونها و طعمها
بس في شي واضح برمضان مو حلو .. إي نعم مو حلو .. و هو إن الناس لاهية بعبادتها و ناس لاهية حق تلهي الناس عن عبادتها .. شلون ؟
بالتلفزيون .. تدرون إن ميزانية القنوات برمضان تساوي ميزانية باجي أشهر السنة !! يعني تدرون إشصار الحين ؟ يعني قلبنا الآية صار الشهر شهر دقدقة و مناحة مسلسلات بدل عبادة و تفرغ لله!
أفا والله .. وينا عن حديث السيدة عائشة (رضي الله عنها) لما توصف الرسول عليه الصلاة و السلام في رمضان لما تقول كان لما يأتي رمضان يشد المأزر. متخيليين ؟ يعني نبينا من همته يربط جسمه دليل على الهمة و شدة العزم و يتعبد! الله الله يا حبيبنا يا رسولنا.
كانوا أيام أول يبجون لما يقرب ينتهي الشهر .. صدقوني مو علشان المسلسل التلفزيوني بينتهي .. لأ .. لأن الفرص قاعد تنتهي و روح المحبة بتقل عن باجي الأشهر .. لأن هذا الشهر هو شهر ربنا .. فالبركة بكل شي فيه
.
تدرون شنو أكبر مشكلة برمضان؟
!! إنا ما ننوي النية :)) صدقوني وايد ناس ما تحط نية
معنه دينا الإسلامي بالذات إهتم بالنية و يمكن ما تلقى دين ثاني يعطيك أجر على النية بس و يضاعف لك الأجر أكثر لما تسوي نيتك. يا أخي و أختي النية تكلف شي ؟ ما تكلف والله .. بس قول مثلا رمضان هذا ما راح أتابع ولا مسلسل .. أو بختم القرآن مع التفسير أو بصلي الفجر بالمسيد ..إلخ و حلاته بعد تصرح بنيتك لواحد قريب من قلبك علشان يمكن يشاركك التطبيق و تكسب أجره و يا زينك لو سويت حتى لو نص اللي نويته ؟ يمكن همتك ما تتقارن مع "شدة المأزر" بس ترى اللي تشوفه شي بسيط عند الله يصبح عظيم .. يا سلام على رحمتك يا رب
:وبهمس لك
لا تقول رمضان صار عادي .. يمكن تحتاج تعيد النظر و تتأمل و تتفكر .. إطلع بهالبريدات و شوف شحلات الدنيا و شلون حتى اليهال اللي ما يصومون مستانسين .. جرب صلاة التراويح .. جرب تسبح و تستغفر أكثر مرة بحياتك .. جرب الصدقة بالخفاء .. نزل فطور للمحتاجين .. جرب تقرى أعذب الآيات و تسمع خواطر أفقه المشايخ المفوهين .. و تتمتع بكل يوم من هالشهر .. يا حلاته من دين .. كل شي فيه حلو نبي هالشهر نستانس بالعبادة بالنية الصح.. لو كلنا إمند الإيد و نعاهد نستمتع بالعبادة فيه .. شرط بنعرف شنو يعني متعة العبادة .. و بنقول "الله الله يا رمضان"
أخوكم :مساعد
posted by al_Mnaber @ 2:11 AM
15 Comments:
الله يعطيك العافيه على هالكلام
والله صدق الدنيا لسى بخير :)
رمضان هذا ما حسيت باي مشاعر روحانيه مثل اي رمضان ثاني
والله مدري ليش
الله يرحمنا برحمته
يزاك الله خير :)
الصورة تصلح حق موضوعي إن شالله موعدنا باجر
جزاك الله كل خير
صراحة:موضوع وايد حلو وغايه بالقرب
مشكلة كبيرة اذا مر علينا رمضان وما حسينا بقيمة ايامة ولحظاته
الله يعينا على طاعته ويتقبل منا
صج سبحان الله..
انا وحده اعرفها كله مالها خلق و السوالف يالله تطلع منها.. الحين كله مستهله و النفس ماشــاءالله لا إله إلا الله عسل !!
و بعد الحلو ان كل الناس ودها تسوي شي يعني اي احد مايحب الدروس برمضان يحبهاو يتشجع يروحلها..
ف ياريت نستغل هالشي ..
جزاك الله كل خير و بميزان اعمالك يا رب :)
ما شا الله كلام رائع و من القلب للقلب
الله يعطيك العافيه أخوي و يتقبل منك صالح الأعمال :)
كلام عفوي جميل من القلب للقلب
يزاك الله خير
............
ملاحظة : موضوعي جاهز .. أدزه على المنابر بس ما يستقبل عندكم مادري ليش
بحاول اليوم و إذا ما وصل بدزه مادري وين:)
يعطيك العافيه
موضوع رائع
ودايما رمضان تحسه غييير
وتحس بالفرق حتى بالجو
ولما يأذن المغرب وتبدأ الصلوات
تحس جو روحاني عجييييييب خصوصا لما يكون بيتك قريب مسجد :D
يزاك الله خير اخوي مساعد
بارك الله فيك يا أخ مساعد
Thank You : )
صح لسانك ايه و الله رمضان صار شهر للمسلسلات و البرامج اللي ما لها من تالي يا ليت بس يوزعون هالبرامج و المسلسلات على بقية ايام السنة بدال ما يكدسونها في وقت مثل رمضان عاد و الله و المسلسلات كلها هم و غم و نكد و صراخ و طلاق الله يبعدنا عن هالبلاوي او طنازة على خلق الله (و انا باعترف اني اتابع شوي تلفزيون ) الله يبارك لنا في هالشهر عسانا من عواده :) و صح لسانك مرة ثانية رمضان له طعم و جو خاص العبادة و الوصل ما بين الاهل الله يديمها نعمة علينا :)
الله يعطيك على قد نيتك
=)
خوش بوست و الله
الصورة أكثر من رائعه
سعلوه ..
مشكور على الإطراء و نصيحة إذا ما ياج الإحساس .. إنتي حاولي تييبينه لنفسج
ر أ 1 ..
تستاهلينها :) و ناطرين موضوعج
إستكانه..
إي والله صاجة مشكلة اللي يطوف رمضان مثل باجي الأشهر و جزاك الله ألف خير على فكرة الموقع و الجهد المبذول
utmost..
إي والله شي يونس نشوف الناس تتغير برمضان .. و جزاك الله خير
كلود ..
أتمنى أقرى لك شي رمضاني إهني و مشكوره على الدعاء
كويتي رحال..
مشكور حبيبي و ناطر موضوعك
بحرينية ..
صاجة .. أحس إن السكينة تنزل وقت المغرب بالذات .. ليش ما أدري بس في رحمة تنزل هالوقت (ربما)
إيفا..
و فيكم بارك :))
متفرغ..
عساك تكون دوم متفرغ للعبادة .. و ترى إذا إنت مقصر حتى أنا مقصر و أهي و أهو .. بس نسأل الله إن يآجرنا على المحاولة
مها..
مشكوورة .. شجعني إطرائج :))
أحمد..
إنت الأروع
Looking for information and found it at this great site... »
You have an outstanding good and well structured site. I enjoyed browsing through it » » »
That's a great story. Waiting for more. buy online pedinol securely levitra abilify rating+ Jemma in latin Cosmetic+dental+surgeon Cuisinart dc390 coffee maker Net log service not running blindness+levitra Cruel sandals crushing Chevrolet blazer aftermarket parts Beach blanket bingo lyrics Job corp in new england scholarship hp cartridge 23 adam black jack beating online blackjack Broadband internet access vs satellite internet access Thomas rourke uk business credit reports risk scores security system Cialis barato Turbocharger for 1997 toyota camry Norwegian fishermans cap
Post a Comment
<< Home