موقع+برنامج+كيف تختم القرأن؟

يايبتلكم خوش برنامج و ما وصيكم كلكم نزلوه على أجهزتكم .. اتفقنا ؟؟
البرنامج اسمه ذاكر و انتشر قبل جم سنه على الايميل لكن للأسف اختفى و الناس نسته .. الحمدلله اني خاشه الايميل عندي و تبون الصج لقيته بالصدفه و صج صج استانست و نزلته على طووول
هالبرناج حجمه صغير لكن فايدته كبيـــــره .. اهو عبارة عن أدعيه و أذكار تطلع بالوقت اللي انتو اتحددونه و تذكركم بالله سبحانه و تعالى و انتو بقمة انشغالكم على الكمبيوتر
كلنا عارفين شلون الوقت يضيع على النت بدون ما انحس فليش ما نثري هالوقت بذكر الله ؟ كلمات و عبارات بسيطه بس أكيد أجرها ما يضيع عند رب العالمين .. صدقوني بتحسون براحه عجيبه
نزلوا البرنامج و انسوه .. اهو يشتغل بروحه لما اتشغلون الجهاز و تقدرون اتوقفونه اذا تبون
--
بمناسبة شهر رمضان اخترت لكم صفحة من موقع صيد الفوائد اتكلم عن كل شي يخطر على بالكم بهالشهر الفضيل
طبعا الموقع شامل و فيه كل شي متعلق بالإسلام من مقالات و نصائح و محاضرات بأسلوب سهل و بسيط .. انصحكم تحفظون الموقع بقائمة الفيفرت و ماراح اتحسفون
--
شلون تختمون القرآن بشهر او أقل ؟ شوفوا
القرآن يتكون من 600 صفحة تقريبا و أيام الشهر 30 يوم اوكي ؟ 600/30 يساوي 20 صفحة باليوم
تقدرون تقرون 4 صفحات عند كل صلاة يعني 20/5 و هم تقدرون اتوزعونها مثل ما تبون .. طبعا كل ما زادت قراءتكم راح تختمونه أسرع لكن احنا ما نبي السرعه .. نبي التدبر و التركيز
كل اللي عليكم اتسوونه انكم تقرون 20 صفحة باليوم لمدة شهر و بتلقون نفسكم ختمتوا القرآن الكريم كله
--
بوقف خاصية التعليقات بهالبوست لأني عارفة كلامكم الحلو و تعليقاتكم اللي جنها عسل على قلبي .. تدرون شنو ابي منكم ؟ بس دعاء حلو طالع من قلوبكم
ترى انا كويت ليو لا تدعون حق احد ثاني بالغلط .. صج نحيسه